Тропарь преподобного Димитрия Прилуцкого, Вологодского
глас 1
Свыше от Бога, преподобне,/ благодать приял еси духовную,/ и от Него убо познался еси, блаженне,/ того ради и ты духом познал еси лучшая Его,/ будущаго века пребывание,/ и постнически испытався во своих обителех./ И ныне со ангели ликовствуя,/ Спасу всех за ны молися, святе Димитрие, да вси вопием:/ Слава Давшему ти крепость,/ слава Венчавшему тя,/ слава Действующему тобою всем исцеления.
Тропарь преподобного Димитрия Прилуцкого, Вологодского чудотворца, ради сретения его образа в Вологде
глас 4
Возсия днесь, яко солнце,/ пречестный образ священнолепнаго твоего подобия,/ паче солнца лучами чудес твоих всех озаряя,/ тьму бесовскую без вести творя,/ егоже радостно сретаху,/ духовныя лики составльше,/ непрестанно вопием ти:/ Димитрие, отче наш, моли Спаса всех/ сохранити град твой и страну нашу,/ стаду твоему спасение подавая/ и велию милость.
Кондак преподобного Димитрия Прилуцкого, Вологодского
глас 8
От юности, преподобне, крест твой взем, Христу последовал еси,/ в молитвах и пощениих, во бдениих же и злостраданиих плоть твою изнуряя;/ темже и Всевидящее Око, твоя труды видев,/ чудесы тя прославляет и всех звати тебе научает:/ радуйся, преподобне отче Димитрие, постников удобрение.
Кондак преподобного Димитрия Прилуцкого
глас 8
Христа единаго в жизни сей во след идти возжелал еси/ и, Того любовию земная отринув, преминув Небесными,/ с лики Ангел водворяяся, неотступно предстоиши Богови,/ тем и ныне пресвятому твоему образу сретения праздник радостно сотворяюще,/ от недуг исцеление приемлем, благодарно вопиюще:/ радуйся, преподобне отче Димитрие, постников удобрение.
Ин кондак преподобного Димитрия Прилуцкого, Вологодского
глас 3
Жезлом, святе Димитрие, от Бога данным ти,/ люди своя упасе на пажитех закона живоносна,/ зверя же невидимаго шатание сокруши под нозе тебе поющих,/ яко да в бедах тя тепла предстателя имамы.
Ин тропарь преподобного Димитрия Прилуцкого, Вологодского
глас 1
Свыше от Бога преподобне, благодать приял еси, Димитрие преславне,/ и Того силою укрепляем, / Евангельски ходити изволил еси, / отонуду же и от Христа возмездие трудовом обрете, всеблаженне, / Егоже моли/ спастися душам нашим.
Молитва преподобному Димитрию Прилуцкому, Вологодскому чудотворцу
О священная главо, предивный чудотворче, богоносне отче наш Димитрие! Усердно припадающе к тебе, молимся: яви, нам, смиренным и грешным, многомощное твое заступление. Се бо грех ради наших, не имамы дерзновения ко Господу просити Его даров, нам благопотребных, но тебе, молитвенника к Нему благоприятного, предлагаем и просим: испроси нам у благости Его вся яже на пользу душам и телесем нашим: веру, правду, надежду несумненну, любовь нелицемерну, во искушениих мужество, в злостраданиях терпение, в молитвах постоянство, в благочестии преуспеяние, вожделенное здравие, земли плодоносие, воздуха благорастворение, дожди благовременны, житейских потреб довольство, мир во днех наших и благословение свыше на всякая благая дела наша. Не забуди, чудотворче святый, милостиво посещати обитель свою, грады и веси страны нашея православныя, сохраняя и соблюдая их молитвами твоими от всякого зла. Помяни всех, веру и любовь к тебе имущих и имя твое молитвенно призывающих, и во благих прошения их милостиво исполни, осеняя их свыше святоотеческим твоим благословением. Ей святче божий, не лиши и нас грешных твоего многомощнаго заступления, но сподоби нас кончину жития благую улучити и Царствие Небесное унаследовати. Да воспоем и прославим дивнаго во святых своих Бога нашего, Отца и Сына и Святого Духа, во веки веков. Аминь.