Творение двух Максимов
НА ВЕЛИЦЕЙ ВЕЧЕРНИ
На Господи, воззвах: стихиры, глас 1.
Подобен: Начало ныне положим:

Ныне время наста, о празднолюбцы, / во псалмех и пениих прославити / Бога, дивнаго во святых Своих, / воздвигшаго нам днесь Иннокентия преславнаго, / молящагося тепле // о душах наших.
Песенными доброты / украшается днесь Церковь первородных, / воспевая невинности тезоименитаго / святителя Пензенскаго и Саратовскаго, / яко предивна своего ходатая // и молитвенника о душах наших.
Троицы Пребезначальныя служителя предобра / и лжемудрствований еретических посрамителя изрядна / память ныне нам наста. / Темже убо стецемся, людие, / похвалити сего тщащеся, / яко велика земли нашея светильника // и молитвенника о душах наших.

Ины стихиры, глас 4:

Сияет, яко солнце светлостию, / память святителя Твоего, Господи, Иннокентия, / скрывшаго нечестие златословесными глаголами, / человекоугодие и высоковыйных превозношение посрамившаго, / кротких землю достигшаго, / егоже молитвами даруй нам грехов очищение, // яко благ и Человеколюбец.
Врачуеши страсти и души просвещаеши верных, / притекающих ко святей раце мощей твоих, / Ангелов собеседниче, Архиереев сопрестольниче, / Апостолов единонравне, исповедников равностоятелю, / преподобных сожителю, благоверия поборниче, // предстателю наш, славне Иннокентие.
Многим воздержанием, святителю, жизнь твою украсив, / путь показал еси, ведущий в жизнь вечную, / Евангельским учением последовал еси, / жестоким же житием плоть твою изнуряя, / гордаго змия воздержанием убил еси. / Темже на небесех водворяяся, / Богови предстоиши, святе Иннокентие, / Егоже моли согрешений оставление даровати // чтущим любовию святую память твою.

Слава, глас тойже:

Радуйся и веселися о Господе, / богоизбранная паства святителя, / ныне песньми венчаемаго, / яко таковаго светильника отца себе имуще и чада нарекостеся, / егоже прослави Бог знаменьми и чудесы Своими преславными, / обильно исцеления неоскудно дарующа приходящим к нему с верою. / Темже, припадая, молимся ему, глаголюще: / о всеблаженне Иннокентие, отче наш, / непрестанно моли Всесвятую Троицу стадо твое спасти, / и яже труды твои и поучения любочестне имеющия, / в добродетели укрепи, // да Небеснаго Царствия улучити сподобятся.

И ныне, догматик гласа:

Иже Тебе ради богоотец пророк Давид / песненно о Тебе провозгласи, / величия Тебе Сотворшему: / предста Царица одесную Тебе. / Тя бо Матерь, ходатаицу живота показа, / без отца из Тебе вочеловечитися благоволивый Бог, / да Свой паки обновит образ, истлевший страстьми, / и заблуждшее горохищное обрет овча, / на рамо восприим, ко Отцу принесет, и Своему хотению, / с небесными совокупит силами и спасет Богородице, мир, // Христос имеяй велию и богатую милость.

Вход, прокимен дне. Чтения три.
Пророчества Исаиина чтение:

Тако глаголет Господь: вси языцы собрашася вкупе, и соберутся князи от них; кто возвестит сия в них, или яже от начала, кто слышана сотворит вам? Да приведут свидетели своя, и оправдятся, и да услышат, и да рекут истину. Будите ми свидетели, и Аз свидетель, глаголет Господь Бог, и отрок егоже избрах, да познаете и веруете Ми, и разумеете, яко Аз есмь: прежде Мене не бысть ин бог, и по Мне не будет. Аз есмь Бог, и несть разве Мене спасаяй; Аз возвестих, и спасох, уничижих, и не бе в вас чуждий. Вы Мне свидетели, и Аз Господь Бог, и еще от начала Аз есмь: и несть от рук Моих избавляяй; сотворю, и кто отвратит то? Сице глаголет Господь Бог, избавляяй вас Святый Израилев.

Премудрости Соломони чтение:

Праведных души в руце Божией, и не прикоснется их мука. Непщевани быша во очесех безумных умрети, и вменися озлобление исход их. И еже от нас шествие сокрушение, они же суть в мире. Ибо пред лицем человеческим, аще и муку приимут, упование их безсмертия исполнено. И вмале наказани бывше, великими благодетельствовани будут, яко Бог искуси я: и обрете их достойны себе; яко злато в горниле искуси их, и яко всеплодие жертвенное прият я. И во время посещения их возсияют: и яко искры по стеблию потекут. Судят языком, и обладают людьми, и воцарится Господь в них во веки. Надеющиися нань разумеют истину, и вернии в любви пребудут Ему; яко благодать и милость в преподобных Его, и посещение во избранных Его.

Премудрости Соломони чтение:

Праведник аще постигнет скончатися, в покои будет. Старость бо честна не многолетна: ниже в числе лет исчитается. Седина же есть мудрость человеком, и возраст старости, житие нескверное; благоугоден Богови быв, возлюблен бысть, и живый посреде грешник, преставлен бысть. Восхищен бысть, да не злоба изменит разума его, или лесть прельстит душу его. Рачение бо злобы помрачает добрая, и парение похоти пременяет ум незлобив. Скончався вмале, исполни лета долга: угодна бо бе Господеви душа его; сего ради потщася от среды лукавствия. Людие же видевше, и не разумевше, ниже положше в помышлении таковое: яко благодать и милость в преподобных Его, и посещение во избранных Его.

На литии стихира, глас 4:

Еретичествующих прещения не устрашився, блаженне, / Православия держаться неотступно научал еси, / и гонения от власть предержащих претерпевая, / будущия радости провидел еси восприятие, / да многотрудным житием своим и ученьми / источник приснотекущий небесныя сладости // нам недостойным покажеши, отче Иннокентие.

Слава, глас тойже:

Вся убо могий о укрепляющем тя Христе, / болезни и немощи смиренно претерпевая, / на Бога все упование возложил еси, / мирскаго пристрастия гнушаяся / и сущая мира яко не сущая вменяя, / чистым умом и немятежным сердцем выну служа Богу, / отонудуже и сосуд Святаго Духа явился еси, // Емуже молися помиловати души наша.

И ныне, Богородичен:

Несть душам нашим ослабы ниже избавления, / токмо молитвами Твоими, Мати Дево, / и милостию от Тебе Воплощшагося Спаса Христа, / к Нему же взываем, / на ходатайство Твое надежду крепку имуще, / да спасет и сохранит всех нас, // песньми Тя яко Богородицу величающих.

На стиховне стихиры, глас 1:

О великий святителю Иннокентие, / егда еретицы новии возсташа на Церковь Божию, / мечем обоюдоострым учения истиннаго посекл еси сих, / верныя же щитом правоверия оградил еси, / сего ради поношения претерпел еси, / да земли Русстей явишися // новое и преславное украшение.
Стих: Нога моя ста на правоте, / в церквах благословлю Тя, Господи.
О пречудне отче Иннокентие, / ныне Церковь Российская ублажает тя, / яко исповедника веры великаго, / чудес обильных реку источающаго, / и святителя всечестна, / паству твою добре упасшаго, / мы же земнороднии, / яко чада ко отцу вопием к тебе // о помиловании в день Судный.
Стих: Суди ми, Господи, / яко аз незлобою моею ходих.
О святче славне Иннокентие, / егда изгнан и поруган людьми был еси, / тогда глас Господень пресладкий над тобою исполнися, / яко изгнаннии правды ради блажени суть, / и Евангельски терпением стяжал еси душу твою, / да иждивше ю ближних ради, / венец нетленный от Владыки всяческих улучиши // и дерзновение превелие молитися о душах наших.

Слава, глас 8:

Земля Российская духовно процветши, / яко крин прекрасный износит днесь / святителя пречудна Иннокентия, / иже молитвами своими облагоухавый ю, / явися нам великий заступник // и ходатай о душах наших.

И ныне, Богородичен по гласу Славы:

Безневестная Дево, / Яже Бога неизреченно заченши плотию, / Мати Бога Вышняго, / Твоих рабов мольбы приими, Всенепорочная, / всем подающи очищение прегрешений: / ныне наша моления приемлющи, // моли спастися всем нам.

Тропарь, глас 5, писан к прославлению:

От юности смиренным нареченный, / в монашестве же чистоте тезоименный, / духовной мудрости любитель ты явился еси, / златовещанный благочестия учитель, / и лживых пагубных учений обличитель, / за Истину безумными гонимый, / незлобие и кротость проповедавый, / и паству Пензенскую ревностне пасый, / святителю всечестне Иннокентие, // моли Христа нас умудрити во спасение.
 

 

НА УТРЕНИ

 

На Бог Господь: тропарь святаго дважды.
Слава, и ныне, Богородичен.
По 1-м стихословии седален, глас 3:

Человецы ликовствуют духовно, обретоша бо молитвенника и предстателя, и похвальными венцы Иннокентия украшающе, яко угодника Христа Бога, егоже молитвами от страстей же и бед избавимся.

Слава, и ныне, Богородичен:

Избави нас молитвами Твоими согрешений бездны, демонскаго озлобления, языческаго пленения и злонравных лукавнейшаго вреда, Владычице, да Тя яко избавительницу нашу величаем.

По 2-м стихословии седален, глас 4:

Страдания за истину подъяв, святителю, теми душу свою очистил еси, ныне же Христа умоли, да в доброделании нас укрепит, грехов очищение подаст и спасет души наша.

Слава, и ныне, Богородичен:

Настави ны на путь покаяния, уклоншияся присно к безпутием зол и Преблагаго прогневавшия Господа, Неискусобрачная Благословенная Марие, Заступнице Усердная рода христианскаго.

По полиелеи седален, глас 2:

Отребие миру, в пучине лжеучения погружаему, вменился еси, святе Иннокентие, но обаче не возможе тя разлучити от любве Божия, яже о Христе Иисусе, Господе нашем, ни скорбь, ни теснота, ни самая смерть.

Слава, и ныне, Богородичен:

Возстани, Пречистая Мати, и воздежи руце Твои молебне к Сыну Твоему и Богу купно со святителем Иннокентием, да избудем многих бед и зол, присно ны по грехом нашим обуревающих.
Прокимен, глас 4: Священницы Твои облекутся в правду / и преподобнии Твои возрадуются.
Стих: Блажен муж, бояйся Господа, в заповедех Его восхощет зело.

Всякое дыхание: Евангелие от Луки, зачало 64.
Слава: Молитвами святителя Христова Иннокентия:
Стихира по Евангелии, глас 6:

Тобою мнози грады же и обители хвалятся, / земли бо Московския еси славное прозябение, / град же святаго Петра и Новаграда честная обитель Юрьевская / постническими подвиги твоими похваляются, / земля Пензенская и пределы Саратовския / процветоша словесы твоими напояеми, / Российская похвало, великий Иннокентие, / ныне во Граде Небеснем вселяяся, // поминай нас, чтущих память твою.

Канон святителю, глас 2, егоже краегранесие сие:
Нищету духовную стяжати сподоби, отче.
Песнь 1

Ирмос: Грядите, людие, / поим песнь Христу Богу, / раздельшему море и наставльшему люди, / яже изведе из работы египетския, / яко прославися.
Небесный Царю, смиренную душу мою от скверн очисти и слова благодать ниспосли, да воспети возмогу достойно ныне подлежащаго в похвалу угодника Твоего, преславнаго Иннокентия.
Имуще тя предстателя добра к щедрому Богу, нас напастьми и обстояниями скорбными одержимых укрепи, подая руку спасения, святителю милостиве Иннокентие.
Щедр и незлобив пастве своей явился еси, отче, темже ума моего помрачение отжени, страстей бурю утиши, к безстрастия пристанищу управи и от злых устен защити твоих молитв покровом, Духа Божия исполненный Иннокентие.
Богородичен: Егда Божиим повелением от временныя жизни отъити хощу, Пречистая, бесовския руки свободи, Ангелы в спутники подаждь и рая вкусити сподоби, идеже Иннокентий святитель с бесплотными лики сладости Божественныя вкушает.

Песнь 3

Ирмос: На камени мя веры утвердив, / разширил еси уста моя на враги моя, / возвесели бо ся дух мой, внегда пети: / несть свят, якоже Бог наш, / и несть праведен, паче Тебе, Господи.
Тя, о великий светильниче, не под спудом но на высоте свещника Церкви Христовы поставленна, смиренне Иннокентие, верно молим: светоносными лучами твоими глубокую тьму греха отжени, невежественных к познанию Истины настави, шатания умов низложи, нас же во Православии укрепи.
Уставил еси, премудре, твоего богоглаголиваго языка струями, токи еретичествующих хульныя и ложныя, и яко безсильныя не возмогоша бо мутными водами лжеучения потопити ны, святе Иннокентие, тем же вопием ти: токи страстей изсуши и вся ко благочестию настави.
Духа Божия исполнився, зловония еретическая низложил еси, кадильнице благовонная, Иннокентие блаженне, паству свою Святыя Православныя Церкве учением облагоухаеши, и всех человек лукавнейшаго злаго вреда избавляеши, да тя, яко наставника предобра, верно возхваляем.
Богородичен: Упование и стена и тихое пристанище людем Твоим, Пресвятая Дево, со угодником Всесвятаго Сына Твоего Иннокентием испроси спасаемых часть улучити и непрестанно в невечернем свете славу Триединому Богу воспевати.

Ин кондак, глас 3.
Подобен: Дева днесь:

Днесь святитель Христов Иннокентий / предстоит Престолу Божию / и с лики святых за ны молится Богу, / емуже ныне со умилением покланяемся / и во псалмех и пениих возвеличиваем, // обретохом бо молитвенника ко Превечному Богу.

Седален, глас 3:

О неизреченныя благости Божия! о неизглаголаннаго Его смотрения! Честныя мощи твоя обретошася ныне, души верных утешая и на брань противу козней лукаваго укрепляя, имже припадающе, тебе усердно вопием: ущедри нас молитвами твоими, святителю Бога всещедраго.

Слава, и ныне, Богородичен:

Иже Отцу сопрестольный Сын на земли воплощся яко человек, из утробы Твоея, Чистая, пройде, порфирою кровей Твоих в наше оболкийся естество, да падшия ны человецы возставит и Небеснаго Сиона гражданы явит.

Песнь 4

Ирмос: Услышах, Господи, / славное Твое смотрение / и прославих, Человеколюбче, / непостижимую Твою силу.
Храм Всесвятаго Духа добродетельми сияющий мирови явился еси, святителю честный, научение книжное прилежно стяжав, тайны неизреченныя судеб Божиих постигл еси, и списанием дел времен минувших верныя премудро во благочестии даже доныне наставляеши, да зовем благодарне: слава силе Твоей, Господи.
Оружием мудрости Божественныя нечестивых препрел еси, исповедниче честный. За истину поношения и гонения благодушно претерпевая, земную мудрость нивочтоже вменяя, непрестанно вопиял: слава силе Твоей, Господи.
В небесныя чертози Ангелы Божии вознесоша чистую душу твою, идеже со святители и исповедники Престолу Всевышняго предстоиши, непрестанно взывая укрепльшему тя на подвиги велии: слава силе Твоей, Господи.
Богородичен: Недвижимое утверждение веры и многоценный дар душам нашим, Богородицу во псалмех и пениих духовных восхвалим, вернии, да избавит от мук вопиющих к Рождшемуся из Нея: слава силе Твоей, Господи.

Песнь 5

Ирмос: Света Подателю и веков Творче, Господи, / во свете Твоих повелений настави нас: / разве бо Тебе, иного бога не знаем.
Укрепляемь силою Троическою, преблаженне, проповедник велегласный пастве Саратовстей явился еси, вопия: «Возвеличите Господа со мною, и вознесем Имя Его вкупе». Темже и мы Владыку небеси и земли величаем: иного бо разве Тебе бога не знаем.
Юность свою постом и молитвою благоукрасил еси, мудре, и священства благодать непорочно стяжати сподобился еси, чудне. И ныне, Престолу Вседержителя предстоя, молися, славне Иннокентие, да огня вечнаго избавимся и от языка лукаваго и озлобления свободимся.
Святителей удобрение и исповедников похвало, чудес источниче, умоли Зиждителя, Егоже пришествие при дверех есть, обрести нам грехов оставление.
Твоих словес наставления, еже Православие в чистоте всем содержати, чужеземным же лжеучением никакоже прилеплятися, окрест объяша всю землю Российскую, ты же Вышнему выну взывал еси: иного бо разве Тебе бога не знаем.
Богородичен: Яже мирови мир подавшая и Начальника тишины рождшая, укроти волнение страстей моих, Чистая, и на камени безстрастия мя утверди, Сыну Твоему взывающа: иного бо разве Тебе бога не знаем.

Песнь 6

Ирмос: Ко Господу от кита Иона возопи: / Ты мя возведи из глубины ада, молюся, / да яко Избавителю во гласе хваления / истины же Духом пожру Тебе.
Житием своим, а не токмо ликом великому святителю Димитрию Ростовскому подобяся, душу свою яко рай богонасажденный сотворил еси. Безумнии же яко сор отринуша тя, не терпя силу словес твоих, Творца восхваляющих истинно, и ныне нас темных падений греховных избави.
Архиерей чуден и нравов исправитель и душ устроитель показался еси, ревностне о людех твоих пекийся, мирским начальником в лице противустал еси, злоковарство и лихоимство тех обличая, святе Иннокентие.
Туне есть тщание наше достойное пение сотворити тебе, Иннокентие предивный, но якоже Христос прият вдовицы два лепта, не возгнушайся страстьми окаянныя души моея, малый сей труд в похваление тебе предприявшаго.
Богородичен: Иже Тобою избавльшеся от бед и скорбей и Тебе ради радость получивше, Мати Безневестная, Тя яко Подательницу благую и Заступницу верную вси величаем.

Кондак, глас 8:

Священнаго и Боговещаннаго проповедника / и дивнаго премудрости учителя / вчинил еси, Господи, в наслаждение благих Твоих и покой: / труды бо онаго и смерть приял еси / паче всякаго всеплодия, // едине Прославляяй святыя Своя.

Икос

Житие непорочное явил еси, невинности тезоименный святителю, к Престолу Господню притекл еси, прехвальне, святительства миром помазан, веры ради гонения претерпев, и ныне чистою душею в райския обители вселився, о иже на земли поющих тя Владыку умоли, преблаженне, знаменьми и чудесы Прославляющаго святыя Своя.

Песнь 7

Ирмос: Образу златому, на поле Деире служиму, / трие Твои отроцы небрегоша безбожнаго веления, / посреде же огня ввержени, орошаеми, пояху: / благословен еси, Боже отец наших.
Скорбные искушения и лютые обстояния смирением попрал еси, тех и нас молитвами твоими избави, блаженне, вопиющих: благословен еси, Боже отец наших.
Пение псаломское воспеша людие, и при словесех «Аз же, Господи, уповаю на Тя» душа твоя святая от тела разлучися. Нас же, на всемощныя твоя молитвы надеющихся, утверди взывати непрестанно: благословен еси, Боже отец наших.
О нас милостивныя длани, Иннокентие, молебне простирай ко Владыце, чадолюбие показуя и неотлучно от нас духом пребывай, отче преподобне, от соблазнов избавляя и в молитве наставляя звати Творцу: благословен еси, Боже отец наших.
Богородичен: Да человеки падшия обожит, явися Сын Твой, Владычице, совершен человек, сего убо моли причастников Божества сотворити поющия: благословен еси, Боже отец наших.

Песнь 8

Ирмос: В пещь огненную ко отроком еврейским снизшедшаго / и пламень в росу преложшаго Бога / пойте, дела, яко Господа / и превозносите во вся веки.
О всеславнем прославлении твоем, святителю, людие Российстии возвеселишася, явился бо еси чудотворец изящный, ходатай наш предивный и милостивый, умоляя о вопиющих усердно: пойте, дела, яко Господа, и превозносите во вся веки.
Божиим промыслом явишася святыя мощи твоя, Иннокентие, аще и храм, идеже погребено бысть святое тело твое, от безбожных разорен бысть. Мощи же твоя, аще и поругани быша, целы явишася, яко звезда пресветлая, просвещая всех притекающих к тебе и Богу зовущих: пойте, дела, яко Господа, и превозносите во вся веки.
Иже вся сети вражия крепостию сокрушивый духовною, от тех избави нас твоими молитвами, окормляя живот наш силою Всещедраго Бога, Емуже с тобою покланяемся, велегласно вопиюще: да благословит тварь вся Господа и превозносит во вся веки.
Богородичен: Отеческия славы не отступль, волею к нашей худости снизшел еси от Девы воплощся, Ея же молитвами избави рабы Твоя от напастей и бед и печалей.

Песнь 9

Ирмос: Безначальна Родителя Сын, Бог и Господь, / воплощся от Девы, нам явися, / омраченная просветити, собрати расточенная. / Тем Всепетую Богородицу величаем.
Тело твое честное, священне Иннокентие, источник исцелений чисте приступающим источает, страстей различных тьму отгоняет и светом невечерним просвещает всех хвалящих тя.
Чрево твое воды животныя источник бысть, по словеси Христову, святе, егда проповедник и учитель поставлен был еси, люди Богови приводя и подвизая восхвалити тя, великаго святителя Иннокентия.
Едине Блаже, Христе, и Многомилостиве, Тебе в молитву ныне приводим угодника Твоего Иннокентия. Не презри молитв его грех наших ради, но помилуй нас, непрестанно взывающих: заступничеством святителя нашего помилуй нас.
Троичен: Тебе неприступному Богу и Славы Царю Трисолнечному, строителю и промыслителю всяческих, Единому Благому и Сущему, Божества державу имущему, песнь Трисвятую воспевая, покланяемся присно и непрестанно величаем.
Богородичен: Отроковице Всенепорочная, Мати Дево Пречистая, Сына и Бога Твоего милостива сотвори, и страстей мя праздна яви, молюся.

Светилен

Веселится ныне земля Саратовская, людие Пензенстии тебе покланяются и Христа величают, обретоша бо великое сокровище.

Богородичен:

Владычице Всемилостивая, просвещение помраченныя моея души, Свет истинный миру рождшая, со святителем пречудным Иннокентием Сына Твоего и Бога умоли о всех нас.

На хвалитех стихиры, глас 4:

Жительство наше есть на небесех, / сице божественный Павел рече, / ты же, святе Иннокентие, / весь ум свой к горним возвысив, / прекраснаго онаго рая еще в телеси сый вкусити сподобился еси. / Темже ныне с горними лики водворяяся, / нас еще долу сущих, // молитвами твоими присно ограждай.
Сила Божия в немощи совершается, / тако нам глаголет Господь, / ныне зрим слов сих на тебе преславное сбытие, / яко немощен плотию, / Духа усердный ратоборец нам показася, / ереси усердный обличитель и лжеучений доблестный отгнатель. / Испроси и нам, великий Иннокентие, / от Подвигоположника мужества дар, / во еже противостати лжеучением и ересем, // и твоими молитвами нас немощных присно ограждай.

Ины стихиры, глас 2.
Подобен: Егда от древа:

Егда душа твоя разлучашеся / от тленнаго сего жития, / псалмопевца слышати сладчайший глас, / еже упование твое на Господа есть, / сподобился еси, предивне Иннокентие, / ныне же в раи сладости вчиняяся, / уже не в сениих и гаданиих, / но лицем к лицу зриши Господа. // Молитвами же твоими нас на земли странных присно ограждай.
Егда страдания за истину ты претерпевал еси, / сор и уметы самаго себе вменил еси, / святителю смиренне, отче Иннокентие, / Бог же зряй вся тайная / на свещнице святительства тебе устави / и венец нетленный тебе подаде. / Днесь же небесными и земными гласы ублажаемый, / Господеви помолися, исповедниче, // от всяких лютых ны молитвами твоими оградити.

Слава, глас 5:

Господу нашему токмо Единому / всякую славу, честь и поклонение / в дусе и истине приносити верно подобает, / тако от Церкве Божия научены есмы, / но яко подобие Его в себе возрастившия / да почтутся от нас святыя Его, / яко приснии Божии друзи и доблии венечницы, / в ихже сонме яко пресветлая звезда / Иннокентий святитель нам возсия, / мы же к нему днесь тепле возопием: / яко дерзновение стяжавый ко Спасу нашему, // от всяких лютых молитвами твоими нас ограждай.

И ныне, Богородичен:

Земля Русская, / от лет древних Домом Твоим нареченная, Пречистая, / многажды милости Твоя на себе улучи, / темже и мы ныне, чада Твоя, усердно вопием: / не престай заступати нас, / Царице наша и Владычице, / пучины греховныя избавляющи ны, // и спасение ходатайствуя душам нашим.

Славословие великое, ектении и отпуст.
НА ЛИТУРГИИ
Блаженна от канона, песнь 3-я и 6-я, на 8.

Прокимен, глас 1: Уста моя возглаголют премудрость, / и поучение сердца моего разум. Стих: Услышите сия, вси языцы, внушите, вси живущии по вселенней.

Апостол ко Ефесеем, зачало 233.

Аллилуиа, глас 4: Уста праведнаго поучатся премудрости. Стих: Язык его возглаголет суд.

Евангелие от Иоанна, зачало 36.

Причастен: В память вечную будет праведник, от слуха зла не убоится.

Молитва

О святче Божий, святителю Христов Иннокентие, призри от славы твоея горния и приими молитвы нас, грешных и недостойных рабов твоих, зде пред образом твоим честным [или святыми мощами твоими] припадающих и тепле умоляющих тя, и принеси я ко Престолу вся содержащаго в руце Своей Бога, Емуже ты добре послужил еси во дни земныя жизни твоея. Умоли, угодниче Божий, Всемилостиваго Спаса Христа за богоданную твою паству, тако тя возлюбившую. Отжени от земнаго отечества твоего вся соблазны, раздоры, нестроения. Церковь Христову и град наш огради святыми твоими молитвами от расколов, прельщения иноверием и наветов злых человек. Всех же нас в единомыслии и любве друг ко другу соедини, да едиными устами и единым сердцем воспоем всесвятое и единодержавное Имя Отца, и Сына, и Святаго Духа во веки веков. Аминь.